උසස් අධ්‍යාපන හා මහාමාර්ග අමාත්‍යාංශයේ මහාමාර්ග අංශයේ සංවර්ධන අංශය, ඉඩම් සහ ග්‍රාමීය මාර්ග සංවර්ධන ලෙස අංශ 02 කට බෙදා දැක්විය හැකිය.
ඉඩම් අංශය
උසස් අධ්‍යාපන හා මහාමාර්ග අමාත්‍යාංශයේ මහාමාර්ග අංශයේ ඉඩම් අංශය නව ව්‍යාපෘති ඉදිකිරීමේදී හා පුනරුත්ථාපනය කිරීමේදී අවශ්‍ය වන ඉඩම් අත්පත් කරගැනීමේ කටයුතු හා ඒ සම්බන්ධ ක්‍රියාවලිය හා බැඳී සිටින ආයතන හා පුද්ගලයින් සමඟ මනා සම්බන්ධීකරණයක් පවත්වා ගෙන යාම සහ ඒ හා අදාළ සියලු කටයුතු සඳහා පහසුකම් සැලසීම සඳහා වගකිවයුතු අංශයක් ලෙස හැඳින්විය හැක. මෙම අංශය මඟින් සිදුකරනු ලබන ප්‍රධාන කාර්යයන් පහත පරිදි දැක්විය හැක.
අංශයේ ප්‍රධාන කාර්යභාරයන්;
- නව මාර්ග ව්‍යාපෘති සහ මාර්ග සංවර්ධන කටයුතු වලට අදාල ඉඩම් අත්කර ගැනීම සඳහා, ඉඩම් අත්කරගැනීමේ පනතේ 2 වන වගන්තියට අනුව අත්පත් යෝජනා සහ 38(අ) අතුරු විධානය යටතේ කඩිනමින් භුක්තිය භාරගැනීමට අදාල ගරු අමාත්‍යතුමාගේ නිර්දේශ ඉඩම් අමාත්‍යාංශය වෙත ඉදිරිපත් කිරීම.
- අත්කරගත් ඉඩම් වලට අදාල ඉදිරි කටයුතු ඉඩම් අත්කරගරනීමේ පනතට අනුව සිදුකිරීම.
- අත්කරගත් ඉඩම් සඳහා වන්දි ගෙවීම් සම්බන්ධයෙන් කටයුතු කිරීම.
- ඉඩම් අත්කරගැනීම් හා වන්දි ගෙවීමට අදාල කාර්යයන් ඉටුකිරීමේදී ඉඩම් අමාත්‍යාංශය, මාර්ග ව්‍යාපෘති, තක්සේරු දෙපාර්තමේන්තුව, මිනින්දෝරු දෙපාර්තමේන්තුව, ප්‍රාදේශීය ලේකම් කාර්යාල, රජයේ මුද්‍රණාලය වැනි ආයතන අතර මනා සම්බන්ධීකරණයක් පවත්වාගෙන සිදුකිරීම.
- ඉඩම් අත්කර ගැනීමේ හා ප්‍රතිස්ථානගත කිරීමේ විශේෂ කමිටු පැවැත්වීම, කමිටු තීරණ සැකසීම හා කමිටු තීරණ දැනුම්දීම ඇතුළු කාර්යයන් ඉටුකිරීම.
- ජනාධිපති ලේකම් කාර්යාලය, අග්‍රාමාත්‍ය කාර්යාලය, පාර්ලිමේන්තු කාරක සභා ආදී ආයතන මඟින් විමසනු ලබන කරුණු සඳහා වාර්තා ඉදිරිපත් කිරීම.
- මහජන දුක් ගැනවිලි විසඳීමට සහය වීම.
- මාර්ග අළුතින් ඉදිකිරීම හෝ සංවර්ධනය කිරීමේ කටයුතු වලදි ඉඩම් අත්කරගැනීම නිසා අවතැන් වන පිරිස් ප්‍රතිස්ථානගත කිරීම සඳහා ඉඩම් මිලදී ගැනීමට, ඉඩම් මිලදී ගැනිමේ කමිටුව මඟින් කටයුතු කිරීම.
- ඉඩම් අත්පත්කර ගැනීමේ පනතේ 38(අ) අතුරු විධානය යටතේ අත්කරගත් එහෙත් මාර්ග සංවර්ධන කටයුතු වලට අවශ්‍ය නොවන බව හඳුනාගත් ඉඩම් සඳහා,ඉඩම් අත්කරගැනීමේ පනතේ 39 (1) වගන්තිය යටතේ ප්‍රත්‍යාදිෂ්ඨ කිරීමට සහ 39 (අ) (1) වගන්තිය යටතේ අවසතු කිරීමට අදාලව ගරු අමාත්‍යතුමාගේ නිර්දේශ, ඉඩම් හා පාර්ලිමේන්තු ප්‍රතිසංස්කරණ අමාත්‍යාංශය වෙත ඉදිරිපත් කිරීම.
- ඉඩම් අත්කර ගැනීමේ පනතේ 2 වන වගන්තිය යටතේ ආඥාවක් නිකුත් කිරීමෙන් අනතුරුව මාර්ග සංවර්ධන කටයුතු වලට අවශ්‍ය නොවන බව හඳුනාගත් ඉඩම් සඳහා, ඉඩම් අත්කරගැනීමේ පනතේ 50 වන වගන්තිය යටතේ අත්හැරීම සඳහා වන නිර්දේශ ඉඩම් හා පාර්ලිමේන්තු ප්‍රතිසංස්කරණ අමාත්‍යාංශය වෙත ඉදිරිපත් කිරීම.
මගනැගුම ග්‍රාමීය මාර්ග සංවර්ධන අංශය
2004 වර්ෂයේ ආරම්භ වූ මෙම අංශය 2005 වර්ෂයේ මහා භාණ්ඩාගාරයෙන් ලැබුණු රුපියල් මිලියන 500 ක ප්‍රතිපාදන සමඟින් දිවයිනේ සියළුම දිස්ත්‍රික්ක ආවරණය වන සේ විධිමත් ග්‍රාමීය මාර්ග සංවර්ධන වැඩසටහනක් ලෙස ක්‍රියාත්මක වීම ආරම්භ විය.
වර්තමානයේ දී උසස් අධ්‍යාපන හා මහාමාර්ග අමාත්‍යාංශයේ එක් ඒකකයක් වන මෙම අංශයේ අතිරේක ලේකම් (සංවර්ධන), අධ්‍යක්ෂ (මගනැගුම), සහකාර අධ්‍යක්ෂ (මගනැගුම), ඉංජිනේරු, සහකාර අධ්‍යක්ෂ (ඉංජිනේරු) යන මාණ්ඩලික නිලධාරීගෙන් හා උපාධිධාරි යෝජනා ක්‍රමවලින් බඳවා ගන්නා ලද සැලසුම් සහකාර, වැඩසටහන් සහකාර, සංවර්ධන නිලධාරී හා රාජ්‍ය කලමනාකරණ සහකාර, ලිපිකරු (මාර්ග සංවර්ධන අධිකාරිය), කාර්යාල කාර්ය සහායකයින් සහිතව කණ්ඩායමක් සේවය කරති.
- වාර්ෂික වැඩ සැලැස්ම හා චක්‍රලේඛ සකස් කිරීම
- අදාල සැලැස්ම හා චක්‍රලේඛ අනුව ග්‍රාමීය මාර්ග සංවර්ධන යෝජනා කැඳවීම.
- සංවර්ධනය කිරීම සඳහා අවශ්‍ය නිර්දේශ ලබාගැනීම සහ ඇස්තමේන්තු සකස් කිරීම..
- ක්‍රියාත්මක ආයතන වෙත ප්‍රතිපාදන නිදහස් කිරීම සහ උපදෙස් ලබාදීම.
- ප්‍රාදේශීය මට්ටමේ සමිති සහ ක්‍රියාකාරී නිලධාරීන් දැනුවත් කිරීමේ වැඩසටහන් පැවැත්වීම.
- ක්ෂේත්‍ර පරීක්ෂණ / නිරීක්ෂණ සිදුකිරීම.
- බිල්පත් අමාත්‍යාංශය වෙත ලබාගැනීම හා පරීක්ෂා කර ගෙවීම් කටයුතු සිදුකිරීම.
- ප්‍රගති සමාලෝචන හා පසුවිපරම් කිරීම යන කාර්යයන් මෙම අංශයේ ප්‍රධාන කාර්යභාරයන් වේ.
